Lucena City, 1st Biofuels City na!

Sa kabila ng malakas na pag-ambon noong Pebrero 21, excited ang mga taga-Lucena City sa pangunguna ni Mayor Ramon Talaga Jr. Iyon kasi ang araw na pormal nang inanunsyo sa publiko ang pagiging kauna-unahang Biofuels City ng Lungsod ng Lucena.

Target ng siyudad na magkaroon ng 20 porsyentong halo ng biofuels ang mga fuel na ginagamit o ibinebenta doon. Magiging sentro rin daw ang siyudad ng testing at processing ng biofuels sa bansa, sa partikular ay biodiesel mula sa niyog o kopra. Kaugnay ng pagiging Biofuels City ng Lucena, ang extension office ng National Biofuels Board (NBB) ay pinasinayaan din ng araw na iyon.
Pinirmahan ang Memorandum of Understanding sa pagitan ng gobyerno ng Lucena at iba't ibang mga ahensya ng National Government na miyembro ng NBB tulad ng Department of Energy, Department of Agriculture, Philippine Coconut Authority.

Gagawing sentro ng biodiesel ang Lucena City bilang lugar sa Pilipinas na may malaking produksyon ng niyog. Wika nga ng mga tagapagsalita mula sa Lucena, sa pagiging Biofuels City ng siyudad, ang animo'y nagtatakipsilim nang industriya ng niyog sa lalawigan ay magbubukang liwayway na raw. Sa katunayan, napakalaki na ng itinaas ng presyo ng niyog ngayong mga araw, P34 na bawat isa ito. Samantalang noong 2004 ay nasa P7 hanggang P8 lamang ito. Itinuturing na dulot ng pagdevelop ng biofuels industry sa lalawigan at iba pang mga lugar ang pagtaas ng bili sa niyog. Ito ay hindi maipagkakailang malaking tulong sa mga magsasaka.

Hindi lang mga magsasaka ang nandoon sa okasyong iyon. Maging ang mga nasa transport sector – pampubliko man o pribado – ay nandoon din. Ayon sa consultants sa vehicle testing and emission, may mga pag-aaral na diumano sa ibang bansang gumagamit ng biodiesel tulad ng France na hindi lang malaking tipid sa presyo ng diesel ang buting naidulot ng biodiesel sa mga motorista, mas naging malayo rin ang kayang takbuhin ng mga sasakyan kung ikukumpara sa sasakyang gumagamit ng regular na diesel.

Samantala, maging mga negosyante sa Lucena at Quezon ay tulong-tulong din sa pag-abot sa hangaring maging tunay na biofuels City ang Lucena. Ayon sa tagapagsalita ng Lucena-Quezon Chamber of Commerce, kampanya nila ang 25-25-25 – nangangahulugan ito ng 25 milyong puno ng niyog na itatanim sa 25,000 hektaryang lupain sa loob ng 25 taon.

Napakaganda nga kung magkakatotoo ito. Bukod sa magiging mas malinis ang hangin sa lugar, mababawasan ang polusyon, napakalaking tulong hindi lang sa mga motorista kundi maging sa mga negosyo at sa buong mamamayan ang pagbaba sa gastusin sa fuel sa sasakyan.
Sana maging matagumpay ito at masundan na ng iba pang mga lugar lalung lalo na ng Metro Manila.