Kabataan para sa tunay na pagbabago

Kailanman hindi nawala ang kabataan sa mga nangyayari sa ating bansa. Subalit ngayong mga araw ay kitang-kita ang kanilang muling pagiging mas aktibo at higit na marami kaysa mga nakaraang taon. Huling tanda ko na dumagsa ang kabataan sa kalye at lansangan sa usaping pulitika sa bansa ay noon pang panahong mainit na usapin ang US Military Bases.

May mga kabataan pa ring nanatiling mapagmatyag at kumilos sa mga maiinit na panglipunang usapin. Pero nitong mga nakaraang taon, hindi maipagkakailang kapansin-pansin ang naging pagbabago ng porma ng mga pagkilos o ekspresyon ng posisyon o sentimyento ng kabataan sa mga pangyayari sa lipunan. Tinawag pa ngang generation “x” ang mga kabataan noong mga unang bahagi ng 199os na nangangahulugang mas biswal ang ekspresyon ng opinion o posisyon, nasa computer at telebisyon ang atensyon. Bandang huling bahagi ng 90s hanggang unang bahagi nitong dekada 2000, tinawag ang kabataan na generation “y”o mga “tekkis” o hi-tech – andyan na ang mga cellphones, i-pod, at iba’t ibang makabagong gadget.

Hi-tech na rin ang ekspresyon ng protesta sa mga nangyayari sa bansa o mga katiwalian sa gobyerno. Nandyan na ang mga e-mail, websites, friendster, at you-tube na siyang nagiging popular na popular ngayon hindi lang sa kabataan kundi sa lahat.

Nitong nakaraang mga linggo, simula nang lumabas ang tinaguriang “star witness” sa kontrobersyal na ZTE-NBN deal, unti-unting umalab ang mga kabataan. Itong linggo lamang, kitang kita ang halos penomenal na paglabas ng mga kabataan sa lansangan na matagal nang hindi nasaksihan sa kanila. Pinapatunayan lamang nito na hindi naman namatay ang aktibismo sa kabataan. Patuloy itong nagmamatyag at sa sandaling kinakailangan ang kanilang paglabas sa kanilang mga klase, paaralan o sa lansangan ay makikita natin ang kanilang pagbuhos at maiingay na sigaw hindi lang para sa “katotohanan” kundi para sa “tunay na pagbabago!”

Nakakatindig balahibo ang ipinakitang suporta ng mga estudyante ng Polytechnic University of the Philippines nang bumisita doon si Jun Lozada nang nakaraang araw. Dagsa at halos madumog ng mga estudyante si Lozada hindi lang dahil sa naniniwala sila dito kundi isang pagpapakita ito ng kagustuhan nila ng pagbabago sa gobyerno at magkaroon ng hustisya sa mga nangyaring korupsyon.

Sa isang banda, malaking epekto sa kabataan ng mga nangyayaring korupsyon dahil malaking pera ang nawawala sa kabang bayan na dapat sana ay magamit sa mas maayos na kinabukasan ng kabataan. Taun-taon na lang ang hangad ng mga estudyante't kabataan ay dagdag na badyet sa edukasyon ganoon din sa kalusugan.

“Panahon nang matigil ang katiwalian. Panahon nang sistema'y magbago.” Ito ang sigaw hindi lang ng mga matatandang progresibo, kundi maging ng mga kabataan rin.

Sana’y matapos itong kinakaharap na krisis pampulitika, patuloy ang aktibismo sa kabataan. Patuloy ang kanilang pakikialam at paggiit para sa isang maayos at may hustisyang kinabukasan nila.