Ang unang hakbang

Sa sitwasyong laganap ang korupsyon, ang taumbayan ang nahihirapan. Dahil kasi sa korupsyon ang utang ng bansa ay lumalaki pero ang proyektong paglalaanan nitong utang ay hindi garantisadong mapapakinabangan. Ang hirap pa nga, dahil sa korupsyon ang proyektong dapat sana’y $160 milyon lang ay dumoble ang presyo at nagging $329 milyon tulad ng ZTE-NBN deal. Ito’y dahil sa mapupuntang komisyon sa mga nag-broker ng deal ganundin sa pumirma nito ayon kay Engr. Dante Madriaga, isang testigong pinatawag ng Senado upang magbahagi ng nalalaman niya tungkol sa ZTE-NBN deal.

Kung susumahin, ang umano’y komisyong umaabot ng mahigit P6 bilyong piso ay napunta lamang diumano sa iilang mga tao samantalang ang daming mahihirap ang walang tahanan at nangangailangan ng atensyong medikal. Subalit dahil sa kakapusan sa pera, marami ang naninirahan sa mga bahay na gawa sa karton o di kaya’y sa ilalim na lang ng puno. Kapag bumisita ka naman sa mga pampublikong ospital, may ilan diyang makikita kang dalawa hanggang tatlong nanay ang pinagkakasya ang mga sarili sa iisang higaan.

Hindi kataka-taka kung mag-alsa man ang mamamayan sa ganitong sitwasyon. Nangyari na ito noong panahon ni dating Pangulong Erap na sinasabing kumita ng malaki sa jueteng. Mas malala ang kaso nitong ZTE-NBN deal kung ikukumpara sa jueteng scandal na nagpabagsak kay Erap. Ang perang ipambabayad kasi sa ZTE-NBN deal ay manggagaling sa kabang bayan. Samantalang ang pera sa jueteng ay hindi direktang nanggagaling sa kabang bayan.

Ang ganitong kalagayan ay hindi lang nagbunga ng isang madilim na bahagi sa ating lipunan. Ito’y nagbigay rin ng liwanag sa atin dahil muling lumitaw ang pagmamahal sa bayan ng mga Pilipino. Alam nating karamihan, kung hindi man lahat, ng Pilipino ay may pagmamahal sa bayan. Subalit marami ang wala ng meron si Jun Lozada. Ito ay ang tapang at kahandaang humakbang sa panig ng katotohanan sa kabila ng mga maaaring masamang mangyari sa kanya at sa pamilya niya.

Ipinakita ng mga pangyayari nitong mga nagdaang araw na kinakailangan lamang may ilang mga taong maunang humakbang at marami ang susunod. Humuhugot ng lakas ang mamamayan sa mga taong may tapang. Kaya, sa kabila ng pagtatangkang pagharang ng gobyerno sa mga magsisipunta sa kilos-protesta sa Makati noong Pebrero 29, nakagawa pa rin ng paraang makalusot ng mamamayan at makarating sa kanilang patutunguhan.
Hangga’t may mga matatapang na handang magsalita at kumilos para sa katotohanan at interes ng bayan, patuloy ang magiging pagkilos ng iba pa. Posibleng lalo pang dumami ang kanilang bilang hangga’t walang resolusyon sa isyung ito at patuloy na nakikita at nararamdaman ang kawalang hustisya sa bayan.