ERC, MALAKI ANG RESPONSIBILIDAD SA MGA KONSYUMER

Ang Energy Regulatory Commission (ERC) ay hindi lang nariyan upang duminig sa mga petisyon ng mga kumpanya ng kuryente at iba pang ahensyang may kinalaman sa kuryente. Unang-una, kaya nariyan yan ay upang protektahan ang interes ng publiko sa isang batayang serbisyong nakakaapekto sa kanila nang malaki.

Ang kuryente ay napakahalaga hindi lamang sa pang-araw-araw na gawain ng isang tao. Ito ay mahalaga sa ekonomiya at pag-unlad ng isang bansa. Kaya nga, sa ibang mga bansa, ang pagpapatakbo sa industriya ng kuryente ay patuloy na nasa kontrol ng kanilang estado.

Subalit, nasa kontrol man o wala ng estado ang operasyon sa industriya ng kuryente, meron talagang ahensyang itinatalaga lagi upang magbantay sa takbo ng industriya at makitang hindi napapagsamantalahan ang mga konsyumer o mga walang kontrol sa industriyang ito. Ang ahensyang ito ay ang Energy Regulatory body. Nag-iiba-iba na lang ang tawag dito sa iba't ibang bansa. Pero ang pangunahing gawain nito ay upang mag-regulate sa industriya ng kuryente.

Sa katunayan, napakalawak ng mga gawain ng ERC natin sa ilalim ng Electric Power Industry Reform Act (EPIRA). Subalit, kapos ito sa pagsulong o di kaya'y pag-protekta sa interes ng mga konsyumer. Ni hindi nga nagiging malawak ang konsultasyong isinasagawa nito sa mga konsyumer. Problema rin kasi ang kakulangan ng paliwanag o edukasyon nito sa mga konsyumer kung kaya mababa rin ang antas ng nagiging partisipasyon ng mga konsyumer sa konsultasyong isinasagawa nito.

Sa nangyaring pagtaas ng singil sa kuryente noong Abril, hindi lang sa generation charge kundi maging sa transmission, distribution, at systems loss, nararapat lang na magpaliwanag ang ERC sa mga konsyumer. Hindi na dapat nito hinihintay pa ang mga konsyumer na humingi ng paliwanag.

Sa panahon ng krisis, lalong nagiging mahalaga sa mga konsyumer ang malaman man lang, kung hindi man tuluyang mapigilan, ang anumang pagtaas sa kanilang mga bayarin, lalo na sa kuryente. Umabot ng mahigit isandaang piso, sa average, ang itinaas ng kuryente noong Abril. Sinasabing patuloy pa nga ang pagtaas hanggang Hunyo. Sa ganitong sitwasyon, mas lalong kinakailangang may inisyatiba ang ERC na magpaliwanag at kulumpunin ang iba't iba pang mga ahensya ng gobyerno at kumpanya ng kuryente na may kinalaman sa pagtaas na ito.

Hindi biro ang binabayaran ng isang pamilya ngayon sa kuryente. Umaabot sa halos 20 hanggang 25 porsyento ng gastusin nila ang napupunta sa pagbabayad lang sa kuryente. Kaya ang impormasyon o kaalaman sa anumang pagbabago ay mahalaga sa kanila,dahil dito rin posibleng magkaroon ng aksyon mula sa kanila at sa mga ahensyang at kumpanyang may kinalaman dito.