Government takeover ng Meralco

Totoong matagal na ngang dapat naging pambansang usapin ang mataas na singil sa kuryente. Subalit ngayong mga araw na lang ito nabigyan ng espasyong halos tulad na ng naibigay sa kontrobersyal na ZTE-NBN Deal.

Sa nangyayaring pagpapalaki sa insidenteng nagsimula lang raw sa pagtanggi ng Meralco sa kahilingan ni Winston Garcia, presidente ng Government Service Insurance System (GSIS), na mabigyan ng kopya ng mga kontrata ng kumpanya sa mga independent power producers (IPPs) nito lalung-lalo na yung mga pagmamay-ari rin ng mga Lopez. Hindi ko maiwasang makapag-isip din na mukhang pinagtutulungan na ang Meralco. Ano nga ba ang tunay na motibo ng Malakanyang o mga ahensya nito ganun din ng iba pang mga politikong nakikisakay sa usaping ito?

Sa matagal nang panahong sumisigaw tayong mga konsyumer na gawan ng aksyon ng pamahalaan ang mataas na presyo ng kuryente ay ngayon lang tila kumilos nang husto ang pamahalaan at mga kasamahan nitong nasa Kongreso. Hindi rin maikakaila ang media war na nangyayari ngayon batay sa sunod-sunod na paid advertisements na nagtatanggol sa Meralco at sa mga balita sa dyaryo at brodkast na halos kuryente ang pinag-uusapan at naka-sentro sa Meralco, lalung-lalo na sa mga Lopez.

Para sa mga konsyumer, lalung lalo ang mga mahihirap, malinaw ang dahilan sa kagustuhang mapag-usapan hindi lang sa media, kundi maging sa kongreso, at iba pang ahensya ng pamahalaan, ang mataas na singil sa kuryente at mga posibleng solusyon dito. Ang nangyayari ngayong “away” ay hindi na lang sa pagitan ng GSIS president at ng mga Lopez. Umaabot na kasi sa kampi-kampihan ito at tila ang kakampi ni Garcia ay ang Malakanyang at mga kakampi rin nito. Posibleng tingnang makakabuti para sa mga konsyumer and atensyong ibinibigay ng media at ng Kongreso at iba pang pamahalaan sa usaping ito. Subalig tila may kulang sa mga nangyayari. Saan nga ba ito talaga papunta? Seryoso ba ang mga kakampi ni Garcia at Malakanyang sa paghahanap ng tunay na solusyon? Hindi kasi malayong isiping may mga pansariling interes rin ang karamihan ng mga pulitiko o Kongresistang sumasakay sa usaping ito.

Sa nangyari na lamang na walong oras na pagdinig sa Senado noong Mayo 12 tungkol sa kung bakit mataas ang presyo ng kuryente. Tila hindi handa ang ating mga Senador, Senadora, at Kongresista sa kanilang mga pagtatanong. Ano ba ang direksyon ng kanilang mga pagtatanong? Dapat sana ay makahanap ng paraan upang pababain ang presyo ng kuryente. Subalit sumentro lamang ito sa Meralco.

Kung tutuusin, hindi na kailangang madagdagan muna ang kontrol ng gobyerno sa Meralco bago makagawa ito ng aksyong maiayos ang industriya ng kuryente at mapababa ang singil sa kuryente. Bilang isang Executive Department, may kapangyarihan itong ipag-utos ang maraming bagay tulad ng maipatupad ang audit ng financial records ng Meralco ganundin ng mga kontrata nito sa kanyang mga IPPs. Matagal na rin dapat binago ng gobyerno ang mga madadaya at pabigat na kontrata nito sa mga IPPs.


PART II
Iyong sinasabi ni Congressman Luis Villafuerte na “ghost deliveries” ng mga IPPs ng Meralco ay nangyayari rin sa mga IPP ng gobyerno. Ang isang pangalan ng “ghost deliveries” ay PPA or purchased power adjustment na nakikita pa natin noon sa ating mga electric bill bago binago hitsura ng electric bill natin noong 2003. Nakikita pa natin noong halos magkapantay ang ibinabayad natin sa PPA at sa aktwal na nakonsumo natin noon.

Tinatawag na ghost deliveries o PPA kasi sinisingil tayo sa kuryenteng hindi naman na-generate at na-deliver. Ito ay dahil nakasaad ito sa kontrata sa mga IPPs (ng Meralco man o ng Napocor) na kailangang bayaran ang IPP sa kinontratang kuryente magamit man ito o hindi. “Take or pay” ang tawag dito. Hindi na kita ngayon ang PPA sa ating electric bill. Ito ay nakapaloob na sa generation charge, kung saan ang bayarin dito'y umaabot sa hindi bababa sa 50 porsyento ng kabuuang bayarin natin sa kuryente.

Sa ika-27 ng Mayo ay magkakaroon ng Stakeholders Meeting ang Meralco. At habang papalapit ang araw na ito ay asahang lalong iinit ang usapin sa Meralco at kung anu-ano pang baho o kahinaan ng Lopezes ang lalabas o mapag-uusapan.

Para sa ating mga konsyumer, habang magandang gamitin ang oportunidad na ito upang lalo pa nating igiit na ang interes natin ang dapat mangibabaw. Hindi nangangahulugang kapag mas tumaas ang shares o pagmamay-ari ng GSIS sa Meralco ay isinusulong na nito ang interes nating mga konsyumer. Huwag nating asahan ito laluna ang tagapagsalita nito ay si Winston Garcia na kwestiyonable rin ang kredibilidad at tunay na intensyon sa pagpupursige sa usaping ito.


May 17 & 19, 2008