Mga konsyumer inililigaw ng Meralco sa tunay na dahilan ng power rates increase

Sinasabi ng Meralco noong nakaraang buwan na ang pagtaas ng presyo ng pinagkukunan nito ng kuryente sa wholesale electricity spot market (WESM) ang pangunahing dahilan ng pagtaas ng singil sa kuryente nitong Abril. Ganito rin ang naging paliwanag niya kahit na sa mga pagdinig ng ahensya ng pamahalaan tulad sa ginanap na consultative meeting noong ika-6 ng Mayo sa Energy Regulatory Commission.

Ang meeting ay ipinatawag ng ERC sa pakiusap ng EmPOWER Consumers – isang bagong alyansa ng mga konsyumer ng elektrisidad – upang maliwanagan ang mga konsyumer sa pagtaas sa singil sa kuryente noong Abril. Meralco ang pangunahing nagpaliwanag doon. Naroon din ang mga kinatawan ng WESM, National Power Corporation, Power Sector Assets and Liabilities Management Corporation (PSALM), at mga kinatawan ng National Transmission Corporation (Transco).

Malinaw ang hinihinging paliwanag ng mga konsyumer – ang ipakita sa kanila o maunawaan nila kung bakit tumaas ang singil sa kuryente. Subalit hindi ganun ka-linaw ang naging paliwanag ng Meralco sa kanila. Inikot-ikot pa nito ang paliwanag, at sa huli, ang tuon ng sisi nito ay sa WESM dahil sa mataas raw na presyo ng kuryenteng binibili dito.

Dahil hindi sapat ang ganitong paliwanag, paulit-ulit na tinanong ng mga kinatawan ng EmPOWER Consumers ang Meralco kung ano nga ba ang bahagi ng bayarin sa generation charge na nagresulta sa pagtaas nito ng 52-sentimos kada kilowatthour. Napilitang magsalita ang opisyal ng Meralco at sabihin ang iba’t ibang pinagkukunan ng kuryente ng Meralco: NPC, WESM, at mga independent power producers na may kontrata sa Meralco – Quezon Power Plant Limited (QPPL), San Lorenzo, at Sta. Rita.

Batay sa datos na nakuha ng EmPOWER Consumers sa Meralco, lumalabas na hindi lang pala ang presyo ng kuryenteng binili ng Meralco sa WESM ang tumaas, maging ang kuryenteng galing sa IPPs ay tumaas din ng may kabuuang mahigit P3 kada kilowatthour. Ang mga itinaas sa presyo kada kilowatthour: QPPL – P2.7088, Sta. Rita – 0.1090, San Lorenzo – 0.1723.

Napocor lang ang hindi nagtaas ng singil, bumaba pa nga ito ng 50-sentimos kada kilowatthour. Totoong ang may pinakamalaking pagtaas ay galing sa WESM. Umaabot ito ng P4.7466 o halos P5 kada kilowatthour. Subalit, 9.15 o wala pang 10 porsyento ng kabuuang kuryenteng ginamit ng Meralco ang nanggaling dito sa WESM samantalang 54.87 porsyento ay nanggaling sa mga IPPs ng Meralco. Kaya kahit nasa P3/kwh lang ang itinaas ng singil ng mga IPPs ng Meralco – mas mababa kumpara sa halos P5/kwh na itinaas ng presyo sa WESM – malaki pa rin ang epekto nito sa kabuuang generation charge na sinisingil sa atin ng Meralco.

Bakit tila itinatago ng Meralco ang ganitong impormasyon? Mabubunyag kasing hindi rin episyente ang plantang kinontrata nito – ang QPPL – at mas mahal kaysa Napocor ang kuryenteng nanggagaling sa mga IPPs – San Lorenzo at Sta. Rita – na pag-aari rin ng Lopezes na siyang may kontrol ngayon sa Meralco.